Kokapena

Olazti Nafarroako ipar-mendebaldean dago, Arabatik eta Gipuzkoatik oso gertu. Udalerria Arakil ibaiak -Burunda du izena lehenbiziko tartean- gurutzatzen du mendebaldetik ekialdera. Ibaiak sakangunea sortu du denboran zehar, Urbasa mendia utzita hegoaldean eta Altzania eta Otzaurte mendiak iparraldean.

Olaztiko herrigunea itsas-mailatik 547 metrora dago. Udalerriak iparraldean eta ekialdean Altsasurekin egiten du muga, hegoaldean Urbasa mendiarekin eta mendebaldean Ziordiarekin.

Komunikabide-gune garrantzitsu batean dago, bertan elkartzen baitira Gasteiz, Iruña eta Donostia lotzen dituzten autobia eta trenbideak. Herrigunetik ateratzen da Urbasa gurutzatuz herritik Lizarraraino doan eskualdeko errepidea.